KOLLIG

‘My mense maak die lewe sinvol’

Hy’s een van die wêreld se gewildste misdaadskrywers. Sy boeke word by die miljoene verkoop – in 28 tale, in meer as 40 lande. Skorpio, sy nuutste riller, is nou op die rakke. Maar Deon Meyer se rykdom is die mense en plekke wat hy liefhet.

Jy het skaars jou aankoms oor die interkom aangekondig of die swaar, wit deur van die ruim woning op Stellenbosch swaai oop. Met sy kenmerkend strelende stem en effe skewe glimlaggie lei Deon Meyer jou na een van die kuiervertrekke. 

Marianne, sy skildervrou, kom stel haarself voor. Ewe kordaat, kort op haar hakke, stap hul groen Indiese ringnekpapegaai, Kokkerotjie. 

KOLLIG

‘Sandra van Kleinmond’ sien uit na wat kom

Sandra Vaughn is ryk, skatryk. Sy’s getroud met die liefde van haar lewe, geseën met kosbare familie en vriende, en beoefen die loopbaan van haar drome. In haar jongste rol speel dié Overbergse aktrise ’n ma van vyf in Semi-Soeter, die eerste Afrikaanse Netflix-rolprent.

Kleintyd het Sandra Vaughn en haar ma baie gebid dat sy ’n talent moet kry. Skole was toe al sportmal – ook in Verwoerdburg waar sy grootgeword het – en sy kon nie juis vinnig hardloop nie. Toe maak ’n dramaskool oop … Sy was op nege die eerste student en meer as vier dekades later is dit steeds vir haar ’n groot lekkerte om aktrise te wees.

AKTUEEL

‘Emigrasie is g’n maklike uitweg’

Emigreer is soos om ’n vreemde sleutel in ’n slot te druk – die sleutel pas dalk perfek, maar dit draai nie die slot nie.

DEUR CECILIA VAN REENEN

Moenie dat enigiemand jou vertel dat land verlaat maklik is nie.

Diegene wat baie te sê het oor patriotisme het nog nie die laaste Sondag voor jul vertrek vir familie en vriende vleis gebraai onder die groot boom wat jy jare gelede daar geplant het nie. Hulle het nog nie verwese met hul handbagasie op die lughawe gestaan en vir die soveelste keer ’n bejaarde ouer vasgedruk en belowe om te kom kuier nie.

INSPIREER

‘Lig op jou kop, Katrienkie’

Sy’s op nege al seksueel misbruik, selfs as kinderprostituut in die Durbanse hawe verhuur. Totdat ’n bedelaarvrou op ’n dag ’n saadjie van hoop by haar geplant het met dié woorde: “Lig op jou kop, Katrienkie.”

DEUR KARIN DE BEER

Op byna 50 is Corné Badenhorst, oftewel “Katrienkie”, van Benoni ’n mooi brunet, gelukkig getroud, die ma van twee seuns. Genade van Bo het haar tot hier gebring, want as tiener het sy op die rand van selfdood getalm weens die trauma van seksuele misbruik deur ’n familievriend. Die verlede spook nog soms by haar, maar sy leef haar roeping uit – as maatskaplike werker, skrywer en motiveringspreker help sy ander. Sy vertel haar storie …

INSPIREER

Op wieke van geloof

Michele Potgieter se geloofspad is vol uitdagings. Sy en haar man het sedert 1996 in Oekraïne sendingwerk gedoen, maar hy is vier jaar gelede aan Covid-19 oorlede en sy moes alleen voortgaan. Nou bevind sy haar wéér in ’n dal van doodskaduwee, maar steeds wankel sy nie.

DEUR UNA NIEUWOUDT

Michele Potgieter is nie iemand wat kla nie. Al het sy vier jaar gelede haar man aan Covid-19 verloor en al moes sy alleen na die oorloggeteisterde Oekraïne terugkeer om die gemeente wat sy en Ockert as jong getroudes in die hawestad Reni gevestig het, te versorg. Sy raak ook nie kwaad of verbitterd nie. Al is haar enigste dogter, Mari-Alena (24), onlangs ná ’n moedige stryd teen kanker oorlede.

HUMOR

Koes, hier kom ’n hoes!

’n Hoes sal nooit weer sommer net ’n hoes wees nie – nie ná die Covid-19-tyd van maskers dra en veilige sosiale afstande handhaaf toe hoes in die openbaar ander laat spaander het nie.

DEUR JOHAN STEMMET

In pre-Covid-tye was ’n hoes bloot ’n hoes. Jy kon op enige plek blaf as die krap in die keel jou onverhoeds vang en ’n terloopse “verskoon my” was genoeg om te verseker dat geen haan ooit weer na die hoes kraai nie. Maar ons is mos deur vreemde tye waar enige kuggie in die openbaar met die grootste agterdog bejeën is. Nies of proes tussen ander en jy word onmiddellik persona non grata.

LEEFSTYL

Breek die mag van gewoonte

Ons het almal slegte gewoontes wat die een of ander tyd ons gesondheid en lewensgehalte benadeel. Om daarvan ontslae te raak is dikwels moeilik, maar nie onmoontlik nie. Met die regte strategie en nodige kennis kán jy dit hokslaan, sê ’n kenner.

DEUR UNA NIEUWOUDT

Slegte gewoontes is soos klitsgras aan ’n wolkombers – om daarvan ontslae te raak is makliker gesê as gedaan. Almal ly die een of ander tyd onder die gevolge daarvan en baie voer ’n lewenslange stryd daarteen.

LEEFSTYL

Heeljaar feestyd

Op Rob en Andrea Semple se werf ruik die lug na fynbos en pampasgras, en na bloekomblare, slangbos, wolbos en Kaapse buksboom. Hier, waar Andrea en haar span die mooiste handgemaakte produkte van plantmateriale skep, voel dit elke dag soos Kersfees.

DEUR MARINDA ERLANK

Die Semples se familieplaas is in die hartjie van die vrugbare Elgin-vallei geleë, ’n gebied bekend vir sy natuurskoon, appel- en peerboorde, en fynbos. Die natuurlike plantegroei is welig en groen, en die vallei lê knus tussen die Groenland-, Kogelberg- en Houwhoek-berge.