KOLLIG

Mense se onthou maak haar hart warm

Ons onthou haar as die geliefde Maggie van Orkney Snork Nie. Annette Engelbrecht se pad het egter baie wyer draaie geloop as waarvan Maggie ooit sou kon droom. En miskien, net miskien, gaan ons in die toekoms meer van haar sien …

“Maggie!!!” “Tannie Orkney!”

Só groet mense haar nog gereeld op straat, selfs oorsee, vertel Annette Engelbrecht, wat meer as 30 jaar gelede die rol van Maggie van Tonder in die gewilde TV-reeks Orkney Snork Nie gespeel het.

KOLLIG

Ilse maak elke rol haar eie

Ilse Klink lééf vir aktrise-wees. Sy’s Engelssprekend, maar speel so uitstekend in Afrikaans dat die rolle bly instroom. Sy wil nog lank aanhou en droom daarvan om oor 10 jaar die wêreld plat te reis met ’n musiekblyspel.

“Ek is absoluut mál oor my werk! Min dinge kom naby die vreugde wat ek ervaar as ek toneelspeel.”

AKTUEEL

My kind emigreer … wat nou?

Kanada, Australië of Portugal toe … kinders wat emigreer, is niks nuuts nie. Maar dis bitter moeilik – vir geliefdes wat agterbly én die emigrant wat in ’n nuwe land moet aanpas. Hoe maak julle dit makliker en behou kontak oor vastelande heen?

DEUR KARIN DE BEER

Julle staan styf teen mekaar en kyk en kyk totdat julle nie meer ’n spikkeltjie van jul seun en sy gesin kan uitmaak nie. Die lughawe druis, die trane lê vlak … dié keer gaan hulle nie met vakansie nie. Dis die begin van hul nuwe lewe in ’n land ver, ver weg.

INSPIREER

‘Vergifnis het my vrygemaak’

In 2003 is Rusty Labuschagne, tóé van Zimbabwe, aan moord op ’n visserman skuldig bevind en in die tronk gegooi. Hy’t 10 jaar lank agter tralies oorleef te midde van honger, dors en siekte. Uit sy marteling is ’n storie van genade, vergifnis en genesing gebore.

DEUR UNA NIEUWOUDT

Op die oog af het hy alles gehad: ’n suksesvolle safariplaas, duur speelgoed en ryk, beroemde vriende van oor die wêreld heen. Hy het geld gehad – ook die mag wat daarmee saamgaan en ’n ewigdurende drang na méér. Rusty Labuschagne het vreesloos en gróót geleef.

INSPIREER

Om te wen selfs wanneer jy verloor

Of dit met sy Dakar-motorfiets of sy 4×4 is, op ’n atletiekbaan, oor ’n duin in ’n uithoek van Afrika of by die mees noordelike punt in Europa, Wessel Bosman verstaan dat die pad na regkry dikwels deur swaarkry loop.

DEUR LINETTE RETIEF

Op die ryp jong ouderdom van 66 is Wessel Bosman, voormalige Springbok-hekkieskampioen, ski-oord-entrepreneur en onwaarskynlike Dakar-tydrendeelnemer, se lewe vol stories waarin nie alles altyd volgens plan verloop nie.

HUMOR

Jy moet bicycle ry …

Op skool was hy deel van die ratlose fietsgepeupel. Deesdae trap hy die bulte fluit-fluit uit op sy e-fiets met sy nége ratte … seer boude ofte nie.

DEUR JOHAN STEMMET

“Bicycle ry, ja, jy moet bicycle ry

Bicycle ry dat jy kan mooi boude kry …”

Só sing Anton Goosen lustig sy liedjie “Klein bietjie wyn” terwyl hy “loer hoe die auntie se sterre roer” en hy die papsak sorgvuldig tussen ons verdeel met “’n klein bietjie wyn vir my en ok vir jou”.

LEEFSTYL

Baklei teen kommer

Kommer is ’n normale menslike emosie, maar as jy toelaat dat dit jou gedagtes oorheers, ontaard dit in ’n siklus van negatiewe denke wat baie skade kan aanrig. ’n Kenner gee raad oor hoe om kommer hok te slaan en jou vrede terug te eis.

DEUR UNA NIEUWOUDT

Almal beleef dit: daardie onrustige geknaag in jou binneste wat met onsekerheid gepaard gaan en jou so maklik in ’n knelgreep beetkry – dikwels voordat jy nog in die oggend jou oë behoorlik oopgemaak het. Kommer is die “wat as”-siekte. Dis ook die eerste tree na angs, wat so maklik in stres verander as dit nie beheer word nie.

LEEFSTYL

Daar’s ’n skat op my werf

Op elke werf, groot of klein, is daar ’n skat. Iets kosbaars, besonders, skaars – iets wat jou laat verlang, die hekke van onthou oopmaak of jou hart van vreugde laat bokspring. Hoe lyk die skat op jou werf?

DEUR MARINDA ERLANK

Die skat in Hanlie en Arend de Waal se plaastuin is 76 jaar oud. In die droogtetyd van 2002 koop hulle die plaas Nova Vita, halfpad tussen Merweville en Sutherland – daar waar tuinmaak met min water, uiterste klimaatstoestande en groot moeite gepaard gaan. Saam met die plaas erf hulle meer as 100 outydse lekkerruik-rose in die mooiste kleure.

GESOND

Staan vas!

Goeie balans is uiters belangrik vir veilige beweging, maar word dikwels afgeskeep in oefenroetines. Toets jou balans en verminder jou risiko vir besering deur oefeninge te doen om dit te verbeter.

Balans speel ’n noodsaaklike rol in alle bewegings – van opstaan en stap tot trappe klim en boontoe strek om iets by te kom. Hoewel goeie balans net so belangrik soos spierkrag en kardiovaskulêre fiksheid is, word dit dikwels afgeskeep. Namate ons ouer word, verswak ons balans en ratsheid boonop en só verhoog ons risiko om te val en ernstige beserings op te doen.

ANTOINETTE SÊ

My draadloos is my towertapyt

Bedags is haar draadloos haar metgesel, saans sus hy haar aan die slaap. En soms neem hy haar op ’n towervlug ver verby die horison, skryf Antoinette Pienaar.

Daar is iets in my grootwordjare waaroor ek bitter bly is en as ek nou as grootmens daaraan dink, besef ek die groot geluk daarvan. Ek was al in standerd 9 toe my pappa dit goedgedink het om ’n televisie aan te skaf. Ek het dus grootgeword met ’n FM-pie in die huis.